Thu. Jun 27th, 2019
76 views

ଭାରତକୁ ପାକିସ୍ତାନର ଧମକ : ଆମେ ଭାରତ ପଛରେ ଆଲୋଚନା ପାଇଁ ଗୋଡ଼ାଇ ପାରିବୁ ନାହିଁ

ସେୟାର କରନ୍ତୁ:-

ନୂଆଦିଲ୍ଲୀ : ଆଲୋଚନା ପାଇଁ ଭାରତକୁ ବାରମ୍ବାର ନିବେଦନ କରୁଥିବା ପାକିସ୍ତାନ ଆଜି ଭାରତକୁ କଡ଼ା ଧମକ ଦେଇଛି । ଭାରତ ବର୍ତ୍ତମାନ ସୁଦ୍ଧା ନିର୍ବାଚନ ହ୍ୟାଙ୍ଗ ଓଭର୍‌ରୁ ବାହାରି ପାରିନାହିଁ। ଆମେ ଭାରତ ପଛରେ ଆଲୋଚନା ପାଇଁ ଗୋଡ଼ାଇ ପାରିବୁ ନାହିଁ ବୋଲି ଆଜି ପାକିସ୍ତାନ ବୈଦେଶିକ ମନ୍ତ୍ରୀ ଶାହ ମହମ୍ମଦ କ୍ୟୁରେସୀ କହିଛନ୍ତି।

କ୍ୟୁରେସୀ ଏସ୍‌ସିଓ ସମ୍ମିଳନୀ ଅବସରରେ ସାମ୍ବାଦିକମାନଙ୍କୁ ସୂଚନା ଦେଇ କହିଛନ୍ତି ଯେ, “ଭାରତ ସରକାର ଏବେ ବି ନିର୍ବାଚନ ମାହୋଲରୁ ବାହାରି ପାରୁନାହାନ୍ତି । ଭାରତ ସରକାର ଭାବୁଛନ୍ତି, ପାକିସ୍ତାନ ସହ ଆଲୋଚନା କଲେ ଏହା ସେମାନଙ୍କ ଭୋଟ ବ୍ୟାଙ୍କକୁ ପ୍ରଭାବିତ କରିବ । ବିଜେପି ନେତୃତ୍ୱଧୀନ ସରକାର ହିନ୍ଦୁତ୍ୱବାଦକୁ ଅଧିକ ଗୁରୁତ୍ୱ ଦେଉଛନ୍ତି। ଏହାକୁ ଆଧାର କରି ସେମାନେ ନିର୍ବାଚନ ଜିତିଛନ୍ତି। ଆମେ ଏଠାରେ ମୋଦି ଓ ଇମ୍ରାନ୍‌ ଖାନ୍‌ଙ୍କ ମଧ୍ୟରେ ବୈଠକ ହେବା ଲକ୍ଷ୍ୟରେ ଆସିନାହୁଁ। ଆମେ ଆଉ ଭାରତ ପଛରେ ଆଲୋଚନା ପାଇଁ ଗୋଡ଼ାଇ ପାରିବୁ ନାହିଁ। ଯଦି ଭାରତ ଆଲୋଚନା କରିବାକୁ ଚାହୁଁଛି, ତା’ହେଲେ ଏଥିପାଇଁ ଦ୍ୱାର ଖୋଲା ରହିଛି।”

ସେ ଆହୁରି କହିଛନ୍ତି, “ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିମାନକୁ ପାକିସ୍ତାନ ଆକଶ ମାର୍ଗରେ ଯିବାକୁ ଆମେ ଅନୁମତି ଦେଇଥିଲୁ। ହେଲେ ଭାରତ ସରକାର ଏହାକୁ ବ୍ୟବହାର ନ କରି ଅଧିକ ଦୂରତା ବିଶିଷ୍ଟ ରାସ୍ତାରେ ଯାତାୟାତ କଲେ। ଆମେ କେବଳ ବିଶ୍ୱକୁ ଗୋଟିଏ ବାର୍ତ୍ତା ଦେବାକୁ ଚାହୁଁଛୁ, ପାକିସ୍ତାନ ସର୍ବଦା ଶାନ୍ତି ସ୍ଥାପନ କରିବାକୁ ଚାହେଁ। କେବଳ ପାକିସ୍ତାନରେ ନୁହେଁ ପଡ଼ୋଶୀମାନଙ୍କ ସହ ମଧ୍ୟ ପାକିସ୍ତାନ ଉତ୍ତମ ସମ୍ପର୍କ ରଖିବାକୁ ସର୍ବଦା ଆଗ୍ରହୀ ରହିଛି।”

ସେୟାର କରନ୍ତୁ:-

Leave a Reply

Your email address will not be published. Required fields are marked *