ହନୁମାନ ଜୟନ୍ତୀ ରାଲିରେ ହିଂସା, ୧୦ ପୋଲିସ ଆହତ
ସମ୍ବଲପୁର : ହନୁମାନ ଜୟନ୍ତୀ ବାଇକ ରାଲି ଉପରକୁ ପଥର ମାଡ଼। ସହରର ଧନୁପାଲି ଛକରେ ଏହି ଘଟଣା ଘଟିଥିବା ବେଳେ ଅତିରିକ୍ତ ଏସପି ଓ ଧନୁପାଲି ଆଇଆଇସିଙ୍କ ସମେତ ୧୦ ପୋଲିସ ଆହତ ହୋଇଥିବା ଜଣାପଡିଛି।
ଖବର ଅନୁଯାୟୀ ହନୁମାନ ଜୟନ୍ତୀ ଉପଲକ୍ଷେ ଗୋବିନ୍ଦ ତଲା ଛକରୁ ବାହାରିଥିଲା ବାଇକ ଶୋଭାଯାତ୍ରା। ଏହା ଜେଲ୍ ଛକ, ଧନୁପାଲି ଥାନା ଛକ, ମୋତିଝରଣ ଛକ, ସାକ୍ଷୀପଡ଼ା, ଲକ୍ଷ୍ମୀ ଟକିଜ ଓ ମୋଦିପଡ଼ା ଦେଇ ସହର ପରିକ୍ରମା କରିବାର ଥିଲା। କିନ୍ତୁ ଧନୁପାଲି ଥାନା ଛକରେ ଦୁଇଗୋଷ୍ଠୀ ମଧ୍ୟରେ ହୋଇଥିଲା ପଥର ମାଡ଼। ମସଜିଦ୍ ପାର୍ଶ୍ୱରୁ ଗୋଟିଏ ଗୋଷ୍ଠୀ ଓ ଅପରପାର୍ଶ୍ୱରୁ ଅର୍ଥାତ ବାଇକ୍ ରାଲିରେ ଯାଉଥିବା ଗୋଷ୍ଠୀ ପଥର ମାଡ଼ କରିଥିଲେ।
ଏହାଛଡା ଉତ୍ତ୍ୟକ୍ତ ଲୋକେ ଦୋକାନ ସହ କାର୍ ଓ ବାଇକ ଜାଳି ଦେଇଛନ୍ତି। ଯାହାକୁ ନେଇ ସମ୍ବଲପୁରରେ ଉତ୍ତେଜନା ପ୍ରକାଶ ପାଇଛି। ଜିଲ୍ଲା ସ୍କୁଲ ଛକରୁ ଭିଜିଲାନ୍ସ ଅଫିସ୍ ଛକ ପର୍ଯ୍ୟନ୍ତ ବିଭିନ୍ନ ସ୍ଥାନରେ ଭଙ୍ଗାରୁଜା ଓ ପୋଡ଼ାଜଳା ହୋଇଥିବା ବେଳେ ଶାନ୍ତି ରକ୍ଷା ପାଇଁ ପୋଲିସ ପକ୍ଷରୁ ସଶସ୍ତ୍ର ଫୋର୍ସ ମୁତୟନ କରାଯାଇଛି। ତେବେ ପଥର ମାଡରେ ୧୦ ପୋଲିସ ଆହତ ହୋଇଥିବା ବେଳେ ଧନୁପାଲି ଆଇଆଇସି ଗୁରୁତର ଥିବାରୁ ତାଙ୍କୁ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଥିବା ଣାପଡିଛି।
