Tue. Oct 15th, 2019

ଭାରତର ନାଗାଲାଣ୍ଡରେ ରହିଛନ୍ତି ହିଡ଼ିମ୍ବାଙ୍କ ବଂଶଧର

ମହାଭାରତ ଯୁଦ୍ଧରେ ଭୀମପୁତ୍ର ଘଟୋତ୍କଚ କେତେ ପରାକ୍ରମଶାଳୀ ଥିଲା ଏ କଥା କାହାକୁ ଅଜଣା ନୁହେଁ। ଘଟୋତ୍କଚର ମା ନାମ ହିଡ଼ିମ୍ବା। ସେ ରାକ୍ଷସୀ। ଭୀମଙ୍କୁ ବିବାହ କରିଥିଲେ। ହିଡ଼ିମ୍ବାଙ୍କ ବଂଶଧର ଏବେବି ନାଗାଲାଣ୍ଡରେ ରହିଥିବା କୁହାଯାଏ। ଏହି ସ୍ଥାନକୁ ପୂର୍ବରୁ ନାଗା ହିଲ୍ସ ବା ତୁଏନସାଙ୍ଗଳ କୁହାଯାଉଥିଲା। କିନ୍ତୁ ୧୯୬୧ ମସିହାରେ ନାଁ ବଦଳିଛି। ବର୍ତ୍ତମାନର ନାମ ନାଗାଲାଣ୍ଡ। ପୂର୍ବରୁ ନାଗାଲାଣ୍ଡ କେନ୍ଦ୍ର ଶାସିତ ଅଞ୍ଚଳ ଥିବାବେଳେ ୧୯୬୩ ଡ଼ିସେମ୍ବର ପହିଲାରେ ଏହାକୁ ଦେଶର ୧୬ତମ ରାଜ୍ୟର ମାନ୍ୟତା ପ୍ରଦାନ କରାଯାଇଛି।

ନାଗାଲାଣ୍ଡ ଏମିତି ରାଜ୍ୟ ଯେଉଁଠି ଏକମାତ୍ର ରେଳ ଷ୍ଟେସନ ଓ ଗୋଟିଏ ଏୟାର ପୋର୍ଟ। ଦିମାପୁର ନାଗାଲାଣ୍ଡର ସବୁଠାରୁ ବଡ ସହର। ଏହାକୁ ନାଗାଲାଣ୍ଡର ପ୍ରବେଶ ଦ୍ଵାର ବୋଲି କୁହାଯାଏ। ରାଜ୍ୟର ଉତ୍ତରରେ ଅରୁଣାଚଳ ପ୍ରଦେଶ, ପଶ୍ଚିମରେ ଆସାମ ଓ ଦକ୍ଷିଣରେ ରହିଛି ମଣିପୁର। ନାଗାଲାଣ୍ଡର ପୂର୍ବରେ ମିଆଁମାର ଦେଶ। କିନ୍ତୁ ନାଗାଲାଣ୍ଡର ପ୍ରମୁଖ ଭାଷା ଇଂରାଜୀ। ଏହି ଭାଷାକୁ ଛାଡିଦେଲେ ହିନ୍ଦୀ ଭାଷା ବି ପ୍ରଚଳିତ ହୋଇଥାଏ। ୧୬ଟି ଆଦିବାସୀ ଭାଷାରେ ମଧ୍ୟ ଏଠାକାର ଲୋକେ କଥାବାର୍ତ୍ତା କରନ୍ତି।

ଦିମାପୁରରେ ରହିଛି ମହାଭାରତର ଐତିହାସିକ ପ୍ରତିଛବି। ଯାହା ପର୍ଯ୍ୟଟକଙ୍କୁ ଆକର୍ଷିତ କରିଥାଏ। ଏହି ସ୍ଥାନରେ ରହିଛି ହିଡ଼ିମ୍ବାଙ୍କ ଘର। ଯେଉଁଠି ପଶାପାଲି ଖେଳର ଉଚ୍ଚା ଉଚ୍ଚା ଗୋଟି ପଡି ରହିଛି। ଏମଧ୍ୟରୁ କିଛି ମଧ୍ୟ ଭାଙ୍ଗିଗଲାଣି। କୁହାଯାଏ ଏହି ଗୋଟିରେ ଭୀମ ଓ ତାଙ୍କ ପୁଅ ଘଟୋତ୍କଚ ପଶାପାଲି ଖେଳୁଥିଲେ। ଏହାଛଡା ପାଣ୍ଡବମାନେ ବନବାସ ସମୟରେ ଏଠାରେ ଅନେକ ଦିନ ରହିଥିଲେ।

ଆହୁରି କୁହାଯାଏ ଦିମାପୁରକୁ ହିଡ଼ିମ୍ବାପୁର ନାଁରେ ଲୋକେ ଜାଣନ୍ତି। ଏହି ସ୍ଥାନରେ ରହୁଥିଲେ ହିଡ଼ିମ୍ବା ରାକ୍ଷସୀ ଓ ତାର ଭଉଣୀ। ହିଡ଼ିମ୍ବାଙ୍କୁ ଭୀମ ବିବାହ କରିଥିଲେ। ଘଟୋତ୍କଚ ନାମରେ ଜନ୍ମ ନେଇଥିଲା ପୁତ୍ର। ଯିଏକି ମହାଭାରତ ଯୁଦ୍ଧରେ ପିତାଙ୍କୁ ସହାୟତା କରିବା ପାଇଁ ଭୀମଙ୍କ ନିକଟରେ ପହଞ୍ଚିଥିଲେ। ଘଟୋତ୍କଚ ଏତେ ଶକ୍ତିଶାଳୀ ଯେ, ତାଙ୍କର ଥିଲା ମହାଭାରତ ଯୁଦ୍ଧକୁ ଗୋଟିଏ ଦିନରେ ସାରିବାର କ୍ଷମତା। କିନ୍ତୁ ଯୁଦ୍ଧ ୧୮ଦିନ ହେବବୋଲି ଧାର୍ଯ୍ୟ ହୋଇଥିଲା। ସେଥିପାଇଁ ଶ୍ରୀକୃଷ୍ଣ କରିଥିଲେ ଚକ୍ରାନ୍ତ। କର୍ଣ୍ଣଙ୍କ ଦିବ୍ୟ ବାଣରୁ ସଖା ଅର୍ଜୁନଙ୍କୁ ରକ୍ଷା କରିବା ନିମନ୍ତେ ମହାଭାରତ ଯୁଦ୍ଧରେ ଘଟୋତ୍କଚ ବଧ ହୋଇଥିଲା।  

Leave a Reply

Your email address will not be published. Required fields are marked *