Tue. Oct 15th, 2019

ପରମ୍ପରା ନାଁରେ ଚାଳିଛି ଜୁଆ ଖେଳ : ବାଜି ଲାଗୁଛି ଲକ୍ଷ ଲକ୍ଷ ଟଙ୍କା ଓ ସମ୍ପତ୍ତି

ଭୁବନେଶ୍ଵର :  ଜୁଆ ମାୟାଜାଲରେ ଗଞ୍ଜାମ ଜିଲ୍ଲାର ଅଧିକାଂଶ ଇଲାକା ।  କମ୍ ସମୟରେ ଅଧିକ ଧନ ପାଇବା ଲୋଭରେ ଶ୍ରାଦ୍ଧ ହେଉଛି ଲକ୍ଷ ଲକ୍ଷ ଟଙ୍କା।  ବରବାଦ୍ ହେଉଛନ୍ତି ଶହ ଶହ ପରିବାର। ପୂଜା ସମୟରେ ପରମ୍ପରା ନାଁରେ ଜୁଆ ଭଳି ବେଆଇନ୍ କାର୍ଯ୍ୟ ଚାଲିଛି।  ସେପଟେ ଗତ ୨ ମାସରେ ୨୦ରୁ ଅଧିକ ମାମଲାରେ ଶତାଧିକ ଜୁଆଡିଙ୍କୁ ବାନ୍ଧିଲାଣି ପୁଲିସ।  ହେଲେ ନା ଜୁଆଡିଙ୍କୁ ଫରକ୍ ପଡ଼ୁଛି ନା ବନ୍ଦ ହେଉଛି ଜୁଆ ଆଡ୍ଡା।

ବ୍ରହ୍ମପୁର ଶ୍ରୀରାମ ନଗର ଅଞ୍ଚଳର ଲିଙ୍ଗରାଜ ସାମଲ। ଦିନ ଥିଲା ରାଜ ଉଆସ ଭଳି ୩ଟି ଘର ଥିଲା ତାଙ୍କର।  ହୋଲସେଲ୍ ଆଳୁ ବ୍ୟବସାୟ କରି ଥାଟବାଟରେ ଚଳୁଥିଲେ ସେ।  ହେଲେ ଆଜି କିନ୍ତୁ କାଙ୍ଗାଳ ଅବସ୍ଥା । ପରମ୍ପରା ନାଁରେ ପୂଜା ସମୟରେ ଗଞ୍ଜାମ ଜିଲ୍ଲାରେ ଚାଲିଆସୁଥିବା ଜୁଆ ଖେଳି ବାଜି ଲଗାଇ ଦେଇଥିଲେ ସମସ୍ତ ଧନସମ୍ପତ୍ତି । କିନ୍ତୁ ବରବାଦ୍ ହୋଇଯାଇଛି ସବୁକିଛି । ଏବେ କେବଳ ଢୋକେ ପିଇ ଦଣ୍ଡେ ଜୀଇଁବା ଅବସ୍ଥା ତାଙ୍କର । ପେଟପାଟଣା ପାଇଁ ନିଜ ଠେଲାଗାଡ଼ିରେ ସାହି ସାହି ବୁଲି ସେ ଆଳୁ ବେପାର କରୁଛନ୍ତି । ତାସହ ଜୁଆର ଶିକାର ନହେବା ପାଇଁ ଯୁବପିଢ଼ିଙ୍କୁ ଆହ୍ୱାନ ଦେଇଛନ୍ତି।

ଶାରଦୀୟ ଦୁର୍ଗାପୂଜା ସମୟରେ ଗଂଜାମ ଜିଲ୍ଲାରେ ମଉଜ ପାଇଁ ଚାଲେ ତାସ୍ ଖେଳ। ହେଲେ ପରଂପରା ନାଁରେ ଡେଣା ମେଲାଇ ଚାଲିଛି ଜୁଆ ଆଡ୍ଡା। ନାବାଳକଠୁ ବୟସ୍କ, ଧନସମ୍ପତ୍ତି ବାଜି ଲଗାଇ ଜୁଆ ଖେଳରେ ମସଗୁଲ୍ ସମସ୍ତେ। ଏଠି ଖାଲି ନୋଟ୍ ନୁହେଁ, ସୁନା,ରୂପା, ଘରଦ୍ୱାର ବି କୁଆଡ଼େ ବାଜି ଲାଗେ ।

ପୁଲିସ୍ କେଉଁଠି ଧରପଗଡ଼ କରି ସଫଳ ହେଉଛି ତ ଆଉ କେଉଁଠି ନିଜେ ଆକ୍ରମଣର ଶିକାର ହେଉଛି । ସହରର ୮ଟି ଜୁଆ ଆଡ୍ଡା ଉପରେ ଚଢ଼ାଉ କରି ଶହେରୁ ଅଧିକ ଜୁଆଙ୍କୁ ଗିରଫ କଲାଣି ପୁଲିସ । ତଥାପି ସୁଧାରୁ ନାହାନ୍ତି ଜୁଆଡ଼ି।  ଏଥିପାଇଁ କଠୋର ଆଇନ୍ ବ୍ୟବସ୍ଥା ଦରକାର ବୋଲି ମତ ପ୍ରକାଶ ପାଇଛି।

Leave a Reply

Your email address will not be published. Required fields are marked *