Thu. May 23rd, 2019
967 views

କେନ୍ଦ୍ରାପଡା : ଶଶି ଓ ଅନୁଭବଙ୍କୁ ବଳଦେବଜୀଉ ଭରସା !

ସେୟାର କରନ୍ତୁ:-

ଭୁବନେଶ୍ୱର : ଓଡିଶା ରାଜନୀତିରେ ସର୍ବଦା ଗୁରୁତ୍ୱ ବହନ କରି ଆସିଥିବା କେନ୍ଦ୍ରାପଡା ଜିଲ୍ଲାକୁ ବିଜେଡି ମୁଖିଆ ବୋଧହୁଏ ଠିକ୍ ଭାବେ ଆକଳନ କରିପାରି ନାହାନ୍ତି । ରାଜ୍ୟସଭା ସାଂସଦ ତଥା ଚଳଚ୍ଚିତ୍ର ଅଭିନେତା ଅନୁଭବ ମହାନ୍ତିଙ୍କୁ ଲୋକସଭା ଏବଂ ଅର୍ଥମନ୍ତ୍ରୀ ଶଶୀ ଭୂଷଣ ବେହେରାଙ୍କୁ କେନ୍ଦ୍ରାପଡା ବିଧାନସଭା କ୍ଷେତ୍ର ପାଇଁ ପ୍ରାର୍ଥୀ କରାଯାଇଥିବାରୁ ସାଧାରଣରେ ଏପରି ଚର୍ଚ୍ଚା ହେଉଛି । ଲୋକେ କହୁଛନ୍ତି ବଙ୍ଗ ଶରଣାର୍ଥୀଙ୍କ ପରି ଦୁଇ ନେତାଙ୍କୁ ଥଇଥାନ କରାଯାଇଛି । କିନ୍ତୁ ତୁଳସୀକ୍ଷେତ୍ରର ବଳଦେବଜୀଉ ସାହା ହେଲେ ଏ ଦୁହେଁ ନିର୍ବାଚନ ବୈତରଣୀ ପାରହେବେ ।

କେନ୍ଦ୍ରପଡା ଲୋକସଭା ଆସନରୁ କିଏ ଜିତିବ ? ବୈଜୟନ୍ତ ନା ଅନୁଭବ ? କ’ଣ ହେବ ଅର୍ଥମନ୍ତ୍ରୀ ଶଶୀ ଭୂଷଣ ବେହେରାଙ୍କ ଭାଗ୍ୟ ? କେନ୍ଦ୍ରାପଡା ଲୋକସଭା କ୍ଷେତ୍ରରୁ କେଉଁ ଦଳକୁ ମିଳିବ କେତେ ବିଧାନସଭା ଆସନ? ବିଜେପି ଏଥର ଭଲ ପ୍ରଦର୍ଶନ କରିବ କି? ଏସବୁକୁ ନେଇ ବିଭିନ୍ନ ମହଲରେ ଚର୍ଚ୍ଚା ଚାଲିଥିବା ବେଳେ ରାଜ୍ୟ ରାଜନୀତି ସଂପର୍କରେ ମଧ୍ୟ ଆଲୋଚନା-ପର୍ଯ୍ୟାଲୋଚନା କରାଯାଉଥିବା ଦେଖିବାକୁ ମିଳୁଛି ।

ଅନ୍ୟପକ୍ଷରେ କେନ୍ଦ୍ରାପଡା ଜିଲ୍ଲାର ବୁଦ୍ଧିଜୀବୀ କହୁଛନ୍ତି ବିଜେଡିର ପ୍ରାର୍ଥୀ ଚୟନ ସଠିକ ହୋଇନାହିଁ । ଜିଲ୍ଲାର ନେତାମାନଙ୍କୁ ଅଣଦେଖା କରାଯିବା ଦଳ ପାଇଁ କ୍ଷତିକାରକ ହୋଇପାରେ । କାରଣ କେନ୍ଦ୍ରାପଡା ଜିଲ୍ଲାର ଭୋଟର ରାଜନୀତି ସଂପର୍କରେ ବେଶ୍ ସଚେତନ । କୌଣସି ପ୍ରଲୋଭନରେ ଭଳିଯିବେ ବୋଲି ବିଚାର କରିବା ଠିକ୍ ହେବନି । ପୂର୍ବରୁ ହୋଇଥିବା ଅନେକ ନିର୍ବାଚନରେ ଏହା ପ୍ରମାଣିତ ହୋଇସାରିଛି । ଏହାସତ୍ତେ୍ୱ ମଧ୍ୟ ଚଳଚ୍ଚିତ୍ର ଅଭିନେତା ଅନୁଭବ ମହାନ୍ତିଙ୍କୁ ଲୋକସଭା ଓ ଶଶୀ ଭୂଷଣ ବେହେରାଙ୍କୁ କେନ୍ଦ୍ରାପଡା ବିଧାନସଭା କ୍ଷେତ୍ରରୁ ପ୍ରାର୍ଥୀ କରିଛି ବିଜେଡି । ଯାହାଙ୍କୁ ଲୋକେ ଗ୍ରହଣ କରିପାରୁ ନାହାନ୍ତି । ଦଳୀୟ କର୍ମୀ ବି ଅସନ୍ତୁଷ୍ଟ । ଦଳର ନିଷ୍ପତ୍ତି ସଂପର୍କରେ ମୁହଁ ଖୋଲୁନାହାନ୍ତି ସିନା କିନ୍ତୁ ବାହାରେ ଏଣୁତେଣୁ ଗପୁଛନ୍ତି । କର୍ମୀମାନଙ୍କର ଏପରି ମନୋଭାବ ପତିପକ୍ଷ ଦଳକୁ ସୁହାଇବା ସମମ୍ଭବ ନୁହେଁ ବୋଲି ମତପ୍ରକାଶ ପାଉଛି ।

କେବଳ ସେତିକି ନୁହେଁ, କେନ୍ଦ୍ରାପଡାର ପୂର୍ବତନ ସାଂସଦ ବୈଜୟନ୍ତ ପଣ୍ଡାଙ୍କୁ ଜଣେ ଭଲ ମଣିଷ ବୋଲି ଲୋକେ ଗ୍ରହଣ କରିଛନ୍ତି । କିଛିଦିନ ପୂର୍ବରୁ ଦଳୀୟ ବିବାଦକୁ ନେଇ ତାଙ୍କ ନାମରେ ଅନେକ କଥା କୁହାଯାଇଛି । ହେଲେ ଏହାର ପ୍ରଭାବ ସାଧାରଣ ଲୋକଙ୍କ ଉପରେ ପଡିବା ପରି ମନେ ହେଉନାହିଁ । ଏବେ ବୈଜୟନ୍ତ ବିଜେପିର କେନ୍ଦ୍ରାପଡା ଲୋକସଭା ପ୍ରାର୍ଥୀ । ତାଙ୍କୁ ମୁକାବିଲା କରିବେ ଅନୁଭବ । କେନ୍ଦ୍ରାପଡା ରାଜନୀତି ସଂପର୍କରେ ସଂପୂର୍ଣ୍ଣ ଅଜ୍ଞ ଏହି ନେତା ଜଣଙ୍କ ଚଳଚ୍ଚିତ୍ର ଷ୍ଟାଇଲରେ ବୈଜୟନ୍ତଙ୍କ ବିରୋଧରେ କହି ନିଜର କ୍ଷତି କରୁଛନ୍ତି । କାରଣ ବୈଜୟନ୍ତ ଲୋକଙ୍କ ପାଖରେ ବଦନାମ ନୁହଁନ୍ତି । ଦଳୀୟ ପ୍ରସଙ୍ଗ ନେଇ ଆଟାକ୍ କରାଗଲେ ବୈଜୟନ୍ତଙ୍କ ସପକ୍ଷରେ ଜନମତ ବଢିବା ଅସମ୍ଭବ ନୁହେଁ । ତାହାଛଡା କେନ୍ଦ୍ରାପଡା ସଂସଦୀୟ କ୍ଷେତ୍ରକୁ ବିଜେପି ଦଖଲ କରିବାକୁ ପ୍ରୟାସ ଚଳାଇଛି । ରାଜନୈତିକ ଗୋଟି ଚାଳନା କରୁଛନ୍ତି ଅଭିଜ୍ଞ ରାଜନେତା ବିଜୟ ମହାପାତ୍ର । ସେ ଏଥର ଥିଲେ ପାଟକୁରା ବିଧାନସଭା କ୍ଷେତ୍ରରୁ ବିଜେପି ପ୍ରାର୍ଥୀ । ପ୍ରତିପକ୍ଷ ବିଜେଡି ପ୍ରାର୍ଥୀ ବେଦପ୍ରକାଶ ଅଗ୍ରୱାଲଙ୍କ ମୃତ୍ୟୁ ଘଟିବାରୁ ଏଠାରେ ନିର୍ବାଚନ ଆଉ ହେବନାହିଁ । ଏହା ବିଜୟଙ୍କୁ ନିରାଶ କରିଥିଲେ ମଧ୍ୟ ସେ ଦଳ ପାଇଁ ଫୁଲ ଦମରେ କାମ କରୁଛନ୍ତି । ବିଜୟ ଯେଉଁ ଚକ୍ରବ୍ୟୁହ୍ୟ ରଚନା କରୁଛନ୍ତି ତାହାକୁ ଭେଦ କରିବାର ଦକ୍ଷତା ଜିଲ୍ଲାର କୌଣସି ବିଜେଡି ନେତାଙ୍କର ନାହିଁ ବୋଲି ଆଲୋଚନା ହେଉଛି । ଯଦି ଏହା ସତ୍ୟ ହୁଏ ତାହେଲେ ବିଜେଡି ବଡଧରଣ କ୍ଷତି ସହିବ । ବିଜେଡି-ବିଜେପି ମୁକାବିଲାରେ ଅନ୍ୟ ଆସନରେ ଫାଇଦା ଉଠାଇବ କଂଗ୍ରେସ । ଏପରି ଅନୁମାନକୁ ଭୁଲ ବୋଲି କହି ଆଦୌ ଏଡାଇ ହେବନାହିଁ । କାରଣ କେନ୍ଦ୍ରାପଡା ଅନ୍ୟ ଜିଲ୍ଲା ଗୁଡିକ ଠାରୁ ଭିନ୍ନ । ମୁଖ୍ୟମନ୍ତ୍ରୀ କେନ୍ଦ୍ରାପଡା ଜିଲ୍ଲାରେ ସଭା କରିସାରିଲେଣି । ଆହୁରି ବି ସଭା କରିବେ । ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏଠାକୁ ଆସିବାର କାର୍ଯ୍ୟକ୍ରମ ରହିଛି । ଲୋକଙ୍କ ଉପରେ ଏହାର ପ୍ରଭାବ ପଡିପାରେ । ତେବେ ଭୋଟ୍ ଗ୍ରହଣ ଆହୁରି ଗୋଟିଏ ସପ୍ତାହ ବାକିଥିବା ବେଳେ ଏ ମଧ୍ୟରେ ବର୍ତ୍ତମାନର ସ୍ଥିତି ବଦଳିବା ଅସମ୍ଭବ ନୁହେଁ । ହେଲେ କେଉଁ ଦଳ ନିଜର ସ୍ଥିତି ମଜବୁତ କରିବାକୁ କେଉଁ ତରିକା ଆପଣାଉଛି ତାହା ଦେଖିବାକୁ ବାକି ରହିଲା ।

ସେୟାର କରନ୍ତୁ:-

Leave a Reply

Your email address will not be published. Required fields are marked *