Thu. May 23rd, 2019
338 views

କେନ୍ଦ୍ରାପଡା : ୫ଟି ବିଧାନସଭା କ୍ଷେତ୍ରରେ ବିଜେଡି – ବିଜେପି ଫାଇଟ୍

ସେୟାର କରନ୍ତୁ:-

ଭୁବନେଶ୍ୱର : କେନ୍ଦ୍ରାପଡା ଲୋକସଭା ନିର୍ବାଚନମଣ୍ଡଳୀର ୫ଟି ବିଧାନସଭା କ୍ଷେତ୍ରରେ ଏଥର ବିଜେଡି ଓ ବିଜେପି ମଧ୍ୟରେ କଡା ଟକ୍କର ହେବ । ଦୁଇଟିରେ କଂଗ୍ରେସ ଓ ବିଜେଡି ମୁହାଁମୁହିଁ ହେବେ । ପ୍ରାଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବକ୍ତବ୍ୟରୁ ଏହା ହିଁ ସୂଚୀତ ହେଉଛି ।

ଗତ ମଙ୍ଗଳବାର (୨୩ ତାରିଖ) ଦିନ ଓଡିଶା ଗସ୍ତରେ ଆସିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେନ୍ଦ୍ରାପଡାର ନିକଟବର୍ତ୍ତୀ ବାରୋଠାରେ ବିଜେପି ପକ୍ଷରୁ ଅନୁଷ୍ଠିତ ବିଜୟ ସଂକଳ୍ପ ସମାବେଶରେ ଯୋଗଦେଇଥିଲେ । ଏହି ନିର୍ବାଚନୀ ସଭାରେ ମୋଦି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଟାର୍ଗେଟ କରିବା ସହିତ ରାଜ୍ୟ ସରକାରଙ୍କ ବିଫଳତା ବଖାଣି ଥିଲେ । ଆଉ ଦଳୀୟ ପ୍ରାର୍ଥୀଙ୍କ ଲାଗି ମାଗିଥିଲେ ଭୋଟ୍ । ଏହି ଅବସରରେ ମୋଦି କେନ୍ଦ୍ରାପଡା ଲୋକସଭା କ୍ଷେତ୍ରର ୭ଟି ବିଧାନସଭା ନର୍ବାଚନମଣ୍ଡଳୀ ମଧ୍ୟରୁ ୫ଟିର ନାଁ ନେଇଥିଲେ । ଲୋକସଭା ପ୍ରାଥୀଙ୍କ ସମେତ ରାଜନଗର, ମହାକାଳପଡା, ପାଟକୁରା, ସାଲେପୁର ଓ ମାହାଙ୍ଗାର ବିଧାୟକ ପ୍ରାର୍ଥୀଙ୍କୁ ପଦ୍ମଫୁଲରେ ଭୋଟ ଦେଇ ଜିତାଇବାକୁ ଉପସ୍ଥିତ ଲୋକମାନଙ୍କୁ ମୋଦି କହିଥିଲେ ମଧ୍ୟ ଆଳି ଓ କେନ୍ଦ୍ରାପଡା ବିଧାନସଭା କ୍ଷେତ୍ରକୁ ଏଡାଇ ଯାଇଥିଲେ ।

ଏବେ ଏହି ପ୍ରସଙ୍ଗ କେନ୍ଦ୍ରାପଡା ଜିଲ୍ଲାର ବିଭିନ୍ନ ମହଲକୁ ଚର୍ଚ୍ଚାର ଖୋରାକ ଯୋଗାଇଛି । ସାଧାରଣରେ ଆଲୋଚନା ହେଉଛି ପ୍ରଧାନମନ୍ତ୍ରୀ ମୋଦି ଯେଉଁ ନିର୍ବାଚନମଣ୍ଡଳୀ ଗୁଡିକର ନାଁ ନେଇଛନ୍ତି ସେଠାରେ ବିଜେଡି-ବିଜେପି ମଧ୍ୟରେ କଡା ମୁକାବିଲା ହେବ । କେନ୍ଦ୍ରାପଡା ଓ ଆଳିରେ ବିଜେପିର ସେତେଟା ପ୍ରଭାବ ନଥିବା ବୋଧହୁଏ ମୋଦି ଗୁଇନ୍ଦା ରିପୋର୍ଟରୁ ଅବଗତ ହୋଇସାରିଛନ୍ତି । ତେଣୁ ଏ ଦୁଇ ନିର୍ବାଚନମଣ୍ଡଳୀରେ ହେବ କଂଗ୍ରେସ ଓ ବିଜେଡି ଫାଇଟ୍ । ଆଳିରୁ ପୂର୍ବତନ ମନ୍ତ୍ରୀ ତଥା ରାଜ୍ୟସଭା ସାଂସଦ ପ୍ରତାପ କେଶରୀ ଦେବ ବିଜେଡିର ବିଧାୟକ ପ୍ରାର୍ଥୀ ହୋଇଥିôବା ବେଳେ ତାଙ୍କୁ ମୁକାବିଲା କରୁଛନ୍ତି କଂଗ୍ରେସ ପ୍ରାର୍ଥୀ ବିଧାୟକ ଦେବେନ୍ଦ୍ର ଶର୍ମା । କିନ୍ତୁ କେନ୍ଦ୍ରାପଡା ବିଧାନସଭା କ୍ଷେତ୍ର ସଂପର୍କରେ ଭିନ୍ନ ଚର୍ଚ୍ଚା ହେଉଛି । ବିଜେଡି ବିଧାୟକ ପ୍ରାର୍ଥୀ ତଥା ଅର୍ଥମନ୍ତ୍ରୀ ଶଶୀ ଭୂଷଣ ବେହେରା କେନ୍ଦ୍ରାପଡା ଜିଲ୍ଲାର ହୋଇନଥିବାରୁ ଲୋକେ କଂଗ୍ରେସ ପ୍ରାର୍ଥୀ ତଥା ପୂର୍ବତନ ମନ୍ତ୍ରୀ ଗଣେଶ୍ୱର ବେହେରାଙ୍କ ସପକ୍ଷରେ ମତ ଦେଉଛନ୍ତି । କେତେକ କହୁଛନ୍ତି ବହୁଥର ହାରିଲେଣି ଏଥର ଦେଖିବା । ଏଥିରୁ ଜଣାପଡୁଛି ଗଣେଶ୍ୱରଙ୍କ ପ୍ରତି ଲୋକଙ୍କର ସମବେଦନା ରହିଛି । ଏହା ଭୋଟରେ ପରିଣତ ହେବା ଅସମ୍ଭବ ନୁହେଁ ।

ସେହିପରି ଯେଉଁ ୫ଟି ନିର୍ବାଚନମଣ୍ଡଳୀ କଥା ମୋଦି ଉଠାଇଛନ୍ତି ସେଥିରେ ରହିଛି ରାଜନଗର । ଏହି ନିର୍ବାଚନମଣ୍ଡଳୀରୁ ପୂର୍ବତନ ବିଧାୟକ ଅଲେକ ଜେନା ବିଜେପିରୁ ପ୍ରାର୍ଥୀ ହୋଇଥିôବା ବେଳେ ତାଙ୍କ ବିପକ୍ଷରେ ବିଜେଡିରୁ ପ୍ରାର୍ଥୀ ହୋଇଛନ୍ତି କେନ୍ଦ୍ରାପଡା ପୂର୍ବତନ ବିଜେଡି ଜିଲ୍ଲା ସଭାପତି ଧ୍ରୁବ ସାହୁ । କଂଗ୍ରେସରୁ ଲଢୁଛନ୍ତି ଅଂଶୁମାନ ମହାନ୍ତି । ଏଠାରେ ତ୍ରିମୁଖୀ ପ୍ରତିଦ୍ୱନ୍ଦ୍ୱୀତା ହେବାର ସମ୍ଭାବନା ରହିଛି । ମହାକାଳପଡାରୁ ପୂର୍ବତନ ମନ୍ତ୍ରୀ ଅତନୁ ସବ୍ୟସାଚୀ ନାୟକ ବିଜେଡି ପ୍ରାର୍ଥୀ ହୋଇଥିବା ବେଳେ ବିଜେପିର ବିଜୟ ପ୍ରଧାନ ଓ କଂଗ୍ରେସର ବିଭ୍ରାଂଶୁ ଶେଖର ଲେଙ୍କା ରହିଛନ୍ତି ତାଙ୍କର ପ୍ରତିଦ୍ୱନ୍ଦ୍ୱୀ । ପାଟକୁରା ନିର୍ବାଚନମଣ୍ଡଳୀର ବିଜେଡି ପ୍ରାର୍ଥୀ ବେଦ ପ୍ରକାଶ ଅଗ୍ରୱାଲଙ୍କ ଆକସ୍ମିକ ମୃତ୍ୟୁ ପରେ ଏଠାରେ ନିର୍ବାଚନକୁ ସ୍ଥଗିତ ରଖାଯାଇଥିଲା । କିନ୍ତୁ ବୁଧବାର ନିର୍ବାଚନ ନେଇ ସାନି ବିଜ୍ଞପ୍ତି ପ୍ରକାଶ ପାଇଛି । ଆସନ୍ତା ମଇ ୧୯ ତାରିଖରେ ଭୋଟ୍ ଗ୍ରହଣ କରାଯିବ । ବିଜେପିରୁ ବିଜୟ ମହାପାତ୍ର ପ୍ରାର୍ଥୀ ହୋଇଥିବା ବେଳେ ବିଜେଡ଼ି କାହାକୁ ପ୍ରାର୍ଥୀ କରିବ ଜଣାପଡିନି । ହେଲେ ବେଦୁବାବୁଙ୍କ ପୁଅ ପ୍ରାର୍ଥୀ ହେବେ ବୋଲି ଶୁଣିବାକୁ ମିଳୁଛି । ବାକି ରହିଲା ମାହାଙ୍ଗା ଓ ସାଲେପୁର । ମାହାଙ୍ଗାରେ ହେବ କଡା ଟକ୍କର । କାରଣ ଏଠାରୁ ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନା ବିଜେଡିରୁ ପ୍ରାର୍ଥୀ ହୋଇଥିବା ବେଳେ ବିଜପିରୁ ସାରଦା ପ୍ରଧାନ ଓ କଂଗ୍ରେସର ଦେବେନ୍ଦ୍ର ସାହୁ ନିର୍ବାଚନ ଲଢୁଛନ୍ତି । ଦଳୀୟ ଭୋଟକୁ ବାଦଦେଲେ ତିନି ପ୍ରାର୍ଥୀଙ୍କର ନିଜସ୍ୱ ଭୋଟବ୍ୟାଙ୍କ ରହିଥିବାରୁ ଏଠାରେ ତ୍ରିମୁଖୀ ପ୍ରତିଦ୍ୱନ୍ଦ୍ୱୀତାର ଆଭାସା ମିଳୁଛି । ଏହାଛଡା ସାଲେପୁର ବିଧାୟକ ପ୍ରକାଶ ବେହେରା କଂଗ୍ରେସ ଛାଡି ବିଜେପିରେ ଯୋଗଦେବା ପରେ ଦଳ ତାଙ୍କୁ ଏହି ନିର୍ବାଚନମଣ୍ଡଳୀରୁ ପ୍ରାର୍ଥୀ କରିଛି । ତାଙ୍କ ବିପକ୍ଷରେ ଅଛନ୍ତି ବିଜେଡିର ପ୍ରଶାନ୍ତ ବେହେରା ଓ କଂଗ୍ରେସର ରବିନ୍ଦ୍ର ନାଥ କର । ଏଠାରେ ବି ସମାନ ଅବସ୍ଥା । ପ୍ରାର୍ଥୀ ତିନଜଣଙ୍କ ମଧ୍ୟରୁ କେହି କାହାକୁ କମ୍ ନୁହଁନ୍ତି । କିନ୍ତୁ ପ୍ରକାଶ ଭଲ ସ୍ଥିତିରେ ରହିଥିବା ଆଲୋଚନା ହେଉଛି । ଯଦି ମୋଦିଙ୍କ ଆକଳନ ଅନୁଯାୟୀ ବିଜେପି ସପକ୍ଷରେ ମତଯାଏ ତାହେଲେ ବିଜେଡିକୁ ନିରାଶ ହେବାକୁ ପଡିବ ବୋଲି ରାଜନୈତିକ ପଣ୍ଡିତମାନେ ମତ ଦେଉଛନ୍ତି । କିନ୍ତୁ ବିଜେଡି ସୁପ୍ରିମୋ ନବୀନ ଓଡିଶାରେ ଅନ୍ୟମାନଙ୍କ ଠାରୁ ଲୋକପ୍ରିୟ । ଦଳୀୟ ପ୍ରାର୍ଥୀଙ୍କର ସେ ହିଁ ଶାହା ଭରସା । ଯଦି ଲୋକେ ନବୀନଙ୍କ ଉପରେ ଆସ୍ଥାରଖି ସପକ୍ଷରେ ମତଦେବେ ତେବେ ବିଜେଡି ପ୍ରାର୍ଥୀମାନେ ପାର ଉତାର ହୋଇଯିବେ । ନଚେତ୍ ନିରାଶ ହେବାକୁ ପଡିବ ଏଥିରେ ଦ୍ୱିମତ ନାହିଁ ।

ସେୟାର କରନ୍ତୁ:-

Leave a Reply

Your email address will not be published. Required fields are marked *